Prezidenti Autoridade Munisípiu (PAM) Viqueque Francisco Cruz Simões de Gonzaga Soares hateten, problema bee moos sai hanesan problema priodade ba Munisípiu Viqueque.
“Problema bee moos iha Munisípiu Viqueque ne’e hanesan problema ne’ebé priodade ba ita, tanba ne’e presiza rezolve uluk bee moos lai, tanba lakohi ita-nia komunidade atu terus ba buka bee,” dehan PAM-Viqueque iha serimónia komemorasaun masakre Kraras ba dala 41, iha Kraras,Viqueque.
Nia hatutan, durante ne’e komunidade sira iha Munisípiu Viqueque barak mak halerik ba bee moos, tanba ne’e, buka meiu atu nune’e bele rezolve tiha lai bee moos ne’e ba komunidade sira.
“Ita tau prioridade liuba bee moos, tanba ita-nia komunidade sira durante barak mak sei halerik ba bee moos, ita lakohi komunidade sira atu ba kuru fali bee mota, hemu fali bee merak no hemu fali udan been, tanba ne’e prioridade ba ita mak oinsá atu rezolve bee moos ba komunidade sira ne’ebé seidauk asesu ba bee moos,” nia esplika.
Iha fatina hanesan Veteranu Afonso Soares hateten, iha Kraras mós bee moos susar tebes, tempu bai-loron bee maran hotu.
“Ami iha kararas ne’e konsumu loos deit udan been, tanba bainhira udan iha bee moos iha, udan la iha bai-loron bee maran hotu,” nia dehan.
Nia hatutan, bainhira bai-loron komunidade balun lori masa ba kuru bee iha mota laran, tanba bee posu sira maran hotu.
Iha fatin seluk, Komunidade Suku Uma-Kiik Olinda da Costa, hateten durante ne’e komunidade sira konsumu de’it udan been, tanba bai-loron bee maran hotu.
“Ami iha ne’e hemu de’it udan been, tanba bainhira tempu udan mak bee iha, tempu bai-loro bee maran hotu, iha tempu bai-loron ami ba kuru bee iha mota hodi tein han hodi hemu, udan mai entaun bee posu sira-ne’e iha fali ona,”nia dehan.
Fontes Notisia: https://thediliweekly.com/2024/10/09/bee-moos-sai-problema-prioridade-ba-munisipiu-viqueque/
